اكذب عليك … د. فاضل الزعبي

2014 07 30
2014 07 30

12اكذب عليك لو قلتلك انو احنا بخير .. اكذب عليك لو قلتلك الخير جاي قريب .. اجا شو … شو اللي صاير بينا .. انت احكيلي … شو اللي عم بيصير .. انت فهمني … ورسيني على بر .. انت مش راضي تفهم انا شو بحكي .. طيب يا ابو العررريف انت فهمنا اذا فاهم .. انت مختارنا !!!… ابني خلص جامعة من خمس سنين وما في شغل وانا بصرف عليه .. ولسة انت مختارنا… انت مختارنا !!!… مش قادر اجوز ولا واحد من ولادي … وانتة لسة مختارنا .. انت مختارنا !!!… طلعت الاولاد الصغار من المدرسة مش قادر ادرسهم و ليش ادرسهم … وانتة لسة مختارنا .. انتة مختارنا !!!… وعليش ادرسهم !!!! ميشان يقعدوا بوجهي واصرف عليهم ؟؟… احسن اشغلهم من هسة مساعد ميكانيكي ولا مساعد طوبرجي ولا كهربجي .. على الاقل بيصرفو على حالهم وبيريحوني من مصاريفوهم .. انتة مختارنا يعني لسة مختارنا !!! حتى لو اسمك تغير كل تسع اشهر..

عارف شو كان اجمل شيء في حياتي .. كان اجميل شئ اني اتجوزت وخلفت .. خلفت وانا طاير من الفرح .. خلفت وانا بحلم بالدكتور والمهندس والاقتصادي والممرض وتبع الكمبيوتر …و بحلم انهم بيشتغلو وبيشترو لحالهم احلى سيارة .. واحلى شقة .. وبيصرفو على عرسهم مع احلى عروس .. ويخلفو احلى احفاد وبربيهم ويعلمهم في احسن مدارس .. عارف شو كان احلى شئ بحياتي … كان لما يا مختارنا …. توعدني واطير زي العصافير .. واحلامي زي احلام العصافير .. ويمكن عقلي زي عقل العصافير .. كان يا مختارنا من وعدك .. الفرحة عندي عيد قبل ما يجي العيد وما عمري شفته اجا العيد…قال ايش .. الفرحة عيد قبل العيد .. قال .. من وعودك كان الشمع يولع لحاله من غير ماحدا يولعه من كثر ما كانت الوعود زهرية..بس خلص ما عاد جواي اي شئ … كان جواي اشي كبير.. وهسه خلص ما صار كبير .. انت شوف كنا في ايه.. وصبحنا في ايه.. وانت اختارلي بر وانا ارسي عليه ..