زقزق رقص – د. فاضل الزعبي

2013 12 01
2013 12 01

100اول مره بيسافر أبو يوســف بالطياره…..

ختم الجواز و قعد يستنا في صالة الترانزيت….

على الكرسي اللي جنبه، قاعده وحده حلوه مسافره….

الست طالت علبه شوكلاته و حطتها جنبها و تناولت حبه و اكلتها…. أبو يوســف مد ايده و اكل حبه. …. صفنت الأموره و اطللعت بوجه أبو يوســف و هوه و لا عنده و لا عند باله……

مدت ايدها و اكلت الثانيه. و برضه مد ايده أبو يوســف و اكل حبه……..و هلم جره لما ظل حبه وحده في العلبه…

الحلوه ما مدت ايدها و بدها تشوف شو رح يسوي … رح يوكل الحبه حتى تنفجر فيه و في قلة ادبه….

أبو يوســف مد ايده قص الحبه الاخيره نصين … اكل نص و ترك نص… و الصبيه مستغربه من قلة ادبه و سفالته….

نادو عالطياره و مشو للبوابة… و اجت قعدتها جنب أبو يوســف ….

بعد ما قعدت مدت ايدها في شنتتها ميشان تشوفلها ايشي تتسلى فيه شبس و لا ملبس بعد ما طارت علبة الشوكولاته….

احزروا شو لقت… لقت علبة الشوكلاته تبعتها في الشنته مسكره و ما حدا صايبها….

يعني طول القعده و هي بتوكل من علبة أبو يوســف مش هو بيوكل من علبتها …

شفت يا أبو فهمي هالمقلب … البنت كانت رح تبهدلني و تقل قيمتي و حضرتها بتوكل من حصتي.  و زي ما قال المثل ويش تكره بالنسا ؟ قال : الوقواقه واللعاقه واللي ع رجليها الطراقه….. و انا زي زقزق رقص……

انا من اول ما وعيت على هالدنيا و كلهم بيوكلو من حصتي و بيقلو قيمتي. ….

يعني الموظف اللي راتبه من الظريبه اللي بدفعها ما بيحلالوه الا لما يتف بصباحنا ليل نهار…..

يعني أبو لطفي ماد ايديه في جيوبنا ليل نهار و احلى هوايه عنده يصرخ و يشتم فيي و في اللي  مثلي…….

يعني الكهربا بتغلى و من علبتنا و كمان بتنقطع و بيطفو الشوارع…..

اما الميه بتيجيني ساعتين بالاسبوع و بدفع فاتوره مسبح اولمبي…. و شتوة صغيره… بتسكر الشوارع و بتغرق الانفاق و بتحاصر الناس………

و الاخ أبو عطوه بيشرب المنسف على حسابي لعمه سام…..

بس و الله مشتاق مره يسكرو كل الراديوهات و اخلص من زعيق مذيعي البث المباشر اللي ما بيحلالهم الا يتمسخرو علينا و برضه بيوكلو من علبتنا و مفكرين حالهم بيطعمونا…