( سلفي .. والحادث خلفي )

2015 08 09
2015 08 09

11215069_992278777478750_3610566080828364852_nقال شو سكّٓرت الطريق عالآخر

طب ليش ؟

قال حادث سير مؤلم على طريق المطار، و رغم انو السيارتين اللي عملوا الحادث طلعوا برّه الشارع بفعل قوة الحادث إلّا إنو الأزمه صارت خانقه

طب ليش ؟

انا بقلكوا ليش

الاخوان الشوفيريه بدهم يتفرجوا عالحادث … اه زي ما باحكيلكو … بدهم يقعدوا و يحزنولهم شوي و يصوروا اكم صوره تعبر عن حزنهم عالحادث … و واحد منهم بتصور سلفي و بنشرها على صفحتو و يكتب سلفي و الحادث خلفي .

الاخوان من شدة التاثر و الحزن سكّٓروا الطريق على سيارة الاسعاف و الشرطه… و المشكله انو نص الناس اللي بالازمه بتتحول بقدرة قادر الى اطباء اسعاف

واحد بقول شيلوا المصاب و الثاني بيقول حُطّو المصاب و الثالث بِدّو يساويلو تنفس صناعي و الرابع بقوله تشاهد … تشاهد قبل لا تموت خيّو .

انها معركه و الكل بياجر من عندو المواطنين تجمعوا عالمصاب و قطعوا عنّو الاكسجين و الميّ و الكهربا و عملوا حالة ارباك تشبه الهوشات اللي بتصير بالملاعب .. اللي بصرخ و اللي بركض و اللي بحكي مع الاسعاف و اللي بدو يطول هوية المصاب عشان يعرف مين اهلو … و اللي واقف جنب المصاب و قاعد يحكي مع خطيبتو يوصفلها المشهد و اللي قاعدين يبكوا و يتحسروا على شبابو و بصراحه المشهد مش ناقص غير واحد يبيع بليله و شعر البنات.

لا .. و الاحلى من كل ما سبق انّو بينطلك واحد متطوع و بصير ينظم بالسير على كيفو و كل سيارة بتمرق لازم توقف و تسألو (يا لطيف يا لطيف شو في يا اخي ؟؟ )و هو بقعد يشرحلهم بهدوء و تروي عن القصه من اولها .. و ان الحق على البكم و انو وجهة نظروا و تحليلو الشخصي ان البكم هوّر و خبط بوز الكيا الخمري … و هيك لحد ما تسكِّر شوارع الاردن من الازمه، و الاخ قاعد يشرح للسيارات شو القصه.

والله وكيلكم كُلّو كوم و الاثنين اللي قاعدين بتهاوشوا كوم .. بتسألهم ( انتوا الكو دخل بالحادث ) بقولك لا .. ( طب ليش بتتهاوشوا ).. بقولك اختلاف وجهات نظر انا بقول الحق عالكيا الخمري و هو بيقول الحق عالبكم .!!!! شد شعرك عادي .. اصلا بتحسهم كائنات فضائيه.

و هكذا تستمر المعركه .. و ممكن يتلاقى اثنين مش شايفين بعض من زمان و يقعدوا يتباوسوا و يعبطوا بعض بأرض الحادث .. و ممكن يحصل حالة تعارف جديده هناك … عادي .

و ممكن كمان يصير نصيب و ابن المسعف يتجوز بنت اللي كان ينظم السير … شو المشكله مهي ليخه و طعه و قايمه .

اذا ما كان في اخلاق تحكمنا فالقانون و الامن ما رح يقدر يسيطر على انفلاتنا و همجيتنا … ها لعاد . يا جماعة الخير متى كان الحادث و مصائب الناس فرصة و مكان مناسب لالتقاط الصور .. متى كانت صور الناس المصابه محل تباهي وافتخار.

وا نت شو خصك تصنع من نفسك بطل على ظهر المصاب اللي قاعد يتخبط بدمّو .. ولّ عليك .. انقلع غاد خلي الاسعاف و الشرطه يشوفوا شغلهم و اكفينا شرّك و لا توقف عند الحادث وتزيد الطين بله. و بصراحه اكبر … ( سنحك) فيصل عويد