سيدي المرشح هولاما …. ؟
زبد المحارمة

2013 01 14
2013 01 14

سيدي المُرشح هولاما …. أريد اشتكي عِدكم عليكم ، أمانه لا تجعلون البلد لعبة بين ايديكم ، كم شعار رفعتم والتنافس واضح بينكم ، وكل شعار يقول نريد نحقق أحلامكم ونسدد ديونكم ، ولكن ترى كله حكي بحكي وفشرة عيونكم . ؟!!

سيدي المُرشح هولاما …. أريد اشتكي عِدكم عليكم ، تتسابقون اليوم علينا وعينا ما تشوف غيركم ، كل واحد منكم يريد يقدم إلنا خدمة وحيلكم بينكم ، الناخب يأمر والمرشح يقول تكرم عيونكم ، الآن انتم تترجون فينا لكن بكرا راح نقبل ايديكم ، من كثر شعاراتكم وأسمائكم أصبحنا نتخربط بينكم ، ولما تصبحوا نواب ياريت بس نلاقي ناس تِحجز هوشكم ، نوم … ومكسرات … أثناء الجلسات … والشاطر يقول الغدا بكره عندي جيرة الله عليكم ، وعند التصويت على قضية تهم البلد ينقطع صوتكم ، ونقول يا نوابنا وينكم خربتم البلد الله يخِرب بيتكم . ؟؟

سيدي المُرشح هولاما …. أريد اشتكي عِدكم عليهم ، ترى كثير من الناس يضحك عليكم يقبض ويحلف ويتاجر فيكم ، كثير من الناس أكلوا خيركم وراحوا ينتخبوا غيركم ، وبعد النتيجة أكيد من الندم راح تعضوا ايديكم ، الخسارة حاصلة ويا حسرة عليكم ، وإذا نجحتم راح نبارك ونباهي فيكم ونقول نواب آلامه صلاة النبي وما شاء الله عليهم ، يفتح المزاد والعروض تتهافت بينكم تشريعات وتعيينات … قوانين وتنفيعات … والله يعين البلد عليكم …. راح تكونوا على الفساد حُمولة إضافية … وما راح تقضوا على الفقر والبطالة … ولا تسددوا العجز والمديونية … لأنها كلها شعارات انتخابية وكل ها الحكي سمعناه من غيركم ، بوجودكم ما راح يتحقق رفاهية ولا عدالة اجتماعية ، كلكم راح تتسابقوا على مقعد في الحكومة البرلمانية ، والي ينجح بكرا ببقول الله لا يكثر خيركم ترى بالمصاري أنا اشتريتكم ، وفي النتيجة إلي وصل قال يا جماعة اتقوا الله أنا كاين فانوس سِحري أحقق كل أمانيكم ( بالعربي كنت أضحك عليكم ) ؟؟ .

سيدي المُرشح هولاما … انتم .. يما ويما .. يما قدمتم وعود وقطعتم عُهود لكن كُله كلاما … تعرفوا شو بدنا منكم شي واحد فقط … تتركوا مجال لغيركم …. وكثر الله خيركم .؟؟!

سيدي المُرشح هولاما …. نريد نشتكي عِدكم علينا ، ترى انتم خسارة فينا ، وإحنا نستاهل إلي يسير علينا ، قبل كانت حكومتنا تختار عنا وما عجبنا وبدنا نختار بيدينا ، ولأنا ما سمعنا كلام الحكومة ربنا انتقم منا وجعلكم نواب علينا ، كان مجلس إل 111 وما رضينا ( وراح أأأأخ راح ) ومن الندم عليه راح نوكل ايدينا وياريت يرجع ويشوف شو راح تعملوا فينا لكن شو راح نعمل عزانا الوحيد انه ثلثين المجلس القادم هم من نفس العجينة … وهذا أنتم قدر ومكتوب علينا . ..؟؟