صراحة نيوز – د.بركات عوجان
خير و الصلاة على النبي ..
إصحى إصحى يا ابوي ، انا بين الصاحي و النايم … صوت ابني سليمان و يمكن يكون ابني عبدالملك – من اللخمة ما بعرف مين فيهم –
يا ابوي شو مالك بتحكي و انت نايم ، الله يسامحك يا ابني لو ما صحيتني كان عرفت مين اخر واحد كان بيحكي معي
رأيت فيما يرى النايم ، استاذ علم الجريمة نتنياهو و هو لابس ثوب ابيض و عباية بيضا و طاقية – قلنسوة – بيضاء كمان … و كأنه من اصحاب اليمين ” طبعاً هو من اصحاب اليمين المتطرف ”
بيقولي شو مش عاجبك اني لابس ابيض بابيض ….و بضحك
لابس ابيض لابس كحلي بدي افرمك فرم و ارميك للكلاب ، ما بعرف – و انا بقرب الو – كيف تغير وجه و صار وجه ترامب ، قولتلو شو انت احسن منو ، انتوا نفس العلبة ….الله يلعنكوا يا كفار ، حكى معي بالعربي – و هذا اللي استفزني – قال انت مش امين عام حزب البناء الوطني ، بالله انتوا مصدقين حالكوا … شو هالبيانات اللي بتكتبوها ضدنا و ضد اسرائيل ، مثلاً بيانكوا الاخير مش عاجبكوا التنديد و الشجب بدكوا اجراءات عملية … اعمال و مش اقوال مثل ما قال وزيركوا الشاطر الصفدي ..
احمدوا الله انه احنا سامحين الكوا تشجبوا و تنددوا ، و الله – و انا ما بحلف كذب – لو ما صليتوا على النبي و ضبيتوا اوراقكوا لاقطع المية و الكهربا عنكو …و بيقولي السافل انتو بدون اسرائيل و امريكا بتموتوا من الجوع و الجهل … و بترجعوا تركبوا الجمال ..
الحقيقة انا انحرجت من كلامه – كلامه في منو – و قربت منه اكثر و قلت لنفسي ممكن اني اخلص العالم من هذا المجرم المعتوه او هو بخلصني من هذه الحياة الذليلة ، لكن لما قربت تغير الوجه … و الله – يا جماعة -هذا الوجه بعرفه ، بس الله يسامحك يا ابني صحيتني قبل ما اتمعن و اتفحص هذا الوجه الغانم ؟!!!!!
– العذر منكم جميعاً كوني قد كتبتها باللغة المحكية
د بركات عوجان
