صراحة نيوز – كتب د. خليل النظامي
(الترند)،،
تهمة جديدة لتكميم الأفواه بأسلوب ناعم،،
والله يا جماعة صار الوضع “بخزي” عنجد، يعني الواحد بطل يقدر يفتح ثمه بكلمة إلا وطلعوله “المنظرين وشلل العقليات الأمنية”،، اللي قاعدين تحت المكيفات بوزعوا شهادات بالوطنية والوعي،،،،
وبحكوا عن أي رأي للناس إنه “ركض وراء الترند”،، وكأنه المواطن فاضي أشغال،،، وما عنده فواتير ولا هموم،،، ولا خوازيق،، وبنام وبصحى يدور “لايكات”،،!!!!
هذا الكلام قمة الاستعلاء والرجعية والتخلف،،، واللي يحكيه بحاول يصور وجع الناس وكأنه “تمثيل” مش حقيقة،،
اسمعوني يا جماعة البرستيج الفكري الكذاب،،،
لازم تفهموا إن اتهام الناس بـ الترندية هو تكميم أفواه بأسلوب ناعم ومستفز،، وهذا أسلوب ونمط فأهمه كويس كثير،،،
بس الحقيقة إن الأردني لما ينفجر رقميا، بكون بمارس (فشة غله)،، لأنه بطل في وسيلة ثانية يوصل فيها صوته،،،
الترند عنا بالأردن مش موضة ولا صياعة،،، الترند عنا هو بوصلة الوجع وصرخة الناس لما السكين توصل العظم،،
وهو بيت الشعر والمضافة الرقمية اللي بتجمعنا عشان نقول للكل : (إحنا هون، وشايفين وعارفين شو بصير)،،
وبدل ما تضلكم تحللوا نياتنا من أبراجكم العاجية،، انزلوا للشارع وشوفوا الواقع،، ترى “اللايك” ما بشتري خبز، واللي بكتب منشور بكون محروق دمه مش حابب ينشهر.
وبالنهاية ،،،
الدستور بالمادة (15) كفل حقنا بالتعبير بكل الوسائل، وما اشترط إن الرأي لازم “يعجبكم” عشان يكون حقيقي،،
وبالنهاية،،،
وفروا نصائحكم الفاخرة لأنفسكم،،، ترى الأردني ما بركض وراء “ترند”،،، الأردني الحر بركض وراء رغيف الخبز اللي إنتو مفكرينه “إشاعة”،،
وإذا كان التعبير عن الوجع بنظركم “شحدة لايكات”،،، فإحنا فخورين بهيك شحدة،،،
على الأقل بنشحد كرامة وحقيقة،،، مش بنشحد “برستيج” وراء مكاتب بطلت تشوف الشمس،، كلها سكرتيرات لفوق الركبة،،،
